Opne data om ein million einingar
– Dette er ein milestolpe i arbeidet med å gjere opne offentlege data tilgjengelege i Noreg, sa dåverande direktør ved Brønnøysundregistra, Erik Fossum, då vi i juni gjorde desse dataa tilgjengelege i Difi sitt datahotell.
Einingsregisteret har opplysningar om næringslivet, frivillige organisasjonar og offentlege etatar som finst i ulike offentlege register. Enkeltpersonføretak og aksjeselskap utgjer omtrent 80 prosent av einingane.
Dette blei gjort tilgjengeleg
Datasettet frå Einingsregisteret inneheldt desse elementa:
● organisasjonsnummer
● namn
● organisasjonsform
● adresse
● informasjon om eininga er registrert i Føretaksregisteret eller ikkje
I ettertid har enda fleire opne data blitt tilgjengelege. Dette gjer at brukarane både kan spare pengar og auke verdiskapinga si.
Opne opplysningar
Opplysningar frå Einingsregisteret har lenge vore tilgjengelege gjennom oppslagstenester på Brønnøysundregistra sin nettstad. Det har også vore mogeleg å få tilgang til oversikter frå Einingsregisteret, men då mot eit gebyr.
Oversikta som no blei gjort tilgjengeleg gjennom Datahotellet var eit utdrag som Brønnøysundregistra kunne gjere tilgjengeleg utan å kome i konflikt med gebyrføresegner eller krav om inntening.
Datasettet frå Einingsregisteret gir blant anna oversikt over kopling mellom organisasjonsnummer, namn og organisasjonsform for nesten 950 000 registrerte einingar.
Spent på bruken
– Vi ser for oss at desse opplysningane for eksempel kan brukast til vask av adresser i databasar, til å lage oversikter over næringsdrivande i geografiske område eller til førehandsutfylling av informasjon ved nettbestillingar. Men vi er spente på å sjå kva brukarar av opne data kan få ut av datasettet, sa direktør Erik Fossum.
– Vi er klare over at datasettet ikkje inneheld alle data som potensielle brukarar kunne ønskje seg, men som ledd i arbeidet med tilgjengeleggjering av opne offentlege data, synest vi det er viktig å gjere det vi kan tilgjengeleg.
– Dette er ei byrjing. Ut frå bruken av datasettet og dei tilbakemeldingane vi får, må vi sjå nærmare på kva som vidare kan bli mogeleg, sa Fossum.
Datasett frå Einingsregisteret på data.norge.no
Om Difi sitt datahotell
