Statsråden kom med bod om nybygg
Statsråd Trond Giske (t.v.) gratulerer avtroppande direktør Erik Fossum med vedtaket om nytt registerbygg.
- Eg gratulerer Brønnøysundregistra og alle dei tilsette. Det er organisasjonen sin kvalitet, leveranse og soliditet som er det viktigaste grunnlaget for regjeringa si avgjerd om nybygg, sa nærings- og handelsministeren blant anna.
- Brønnøysundregistra og plasseringa dykkar har vore svært vellukka. De er eit godt eksempel på at det går an å leggje viktige statlege oppgåver andre stader enn i hovudstadsregionen, at det er fullt mogeleg å finne kompetent og stabil arbeidskraft, dyktige menneske til å drifte ei omfattande og viktig verksemd også andre og mindre stader i landet, sa Giske.
Alt i alt vil eit nytt registerbygg koste om lag ein milliard kroner. For 2013 er det løyvt 20 millionar kroner til utgreiingsprosessen, der det blant anna skal takast stilling til kor det framtidige registerbygget skal liggje. Statsbygg overtok ved utgangen av 2012 eigarskapet til byggprosjektet, i nært samarbeid med Brønnøysundregistra og Brønnøy kommune.
